សម្តេចធិបតី ហ៊ុន ម៉ាណែត ជូនពរប្រជាពលរដ្ឋធ្វើដំណើរទៅស្រុកកំណើត ប្រកបដោយសុខសុវត្ថិភាព ក្នុងឱកាសបុណ្យកាន់បិណ្ឌ និងភ្ជុំបិណ្ឌ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្ញើសារជូនពរយ៉ាងកក់ក្តៅ ជូនចំពោះលោកតាលោកយាយ អ៊ំប្រុសអ៊ំស្រី ពូមីង បងប្អូន កូនក្មួយទាំងអស់ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ។

សម្តេចបានជូនពរឱ្យប្រជាពលរដ្ឋទាំងអស់ ធ្វើដំណើរទៅស្រុកកំណើតជួបជុំក្រុមគ្រួសារ ប្រកបដោយសុខសុវត្ថិភាព និងសប្បាយរីករាយក្នុងការលេងកម្សាន្ត។

ក្នុងសារជូនពរនោះ សម្តេចធិបតី ក៏បានបួងសួងជូនពរឱ្យប្រជាពលរដ្ឋទាំងអស់ ទទួលបាននូវសុខភាពល្អបរិបូរណ៍ កម្លាំងមាំមួន អាយុយឺនយូរ និងជោគជ័យគ្រប់ភារកិច្ច។ ពិធីបុណ្យកាន់បិណ្ឌ និងភ្ជុំបិណ្ឌ គឺជាពិធីបុណ្យប្រពៃណីជាតិដ៏ធំមួយរបស់កម្ពុជា ដែលប្រជាពលរដ្ឋខ្មែរតែងតែប្រារព្ធឡើងជារៀងរាល់ឆ្នាំ ដើម្បីឧទ្ទិសកុសលផលបុណ្យជូនដល់បុព្វការីជន និងញាតិសន្តានដែលបានចែកឋានទៅហើយ។

ពិធីបុណ្យនេះក៏ជាឱកាសដ៏វិសេសវិសាលសម្រាប់បងប្អូនប្រជាពលរដ្ឋបានជួបជុំក្រុមគ្រួសារ ញាតិមិត្ត និងចូលរួមធ្វើបុណ្យតាមប្រពៃណីនៅតាមវត្តអារាមនានា៕