លោក Trump យល់ព្រមផ្អាកវាយប្រហារអ៊ីរ៉ង់ ២សប្តាហ៍ ប្រសិនបើទីក្រុងតេអេរ៉ង់បើកច្រកសមុទ្រ Hormuz ឡើងវិញ

ប្រធានាធិបតីអាមេរិក ដូណាល់ ត្រាំ បាននិយាយកាលពីថ្ងៃពុធ ទី៨ ខែមេសាថា លោកបានយល់ព្រម ផ្អាកការទម្លាក់គ្រាប់បែកលើអ៊ីរ៉ង់រយៈពេល២សប្តាហ៍ ដែលជាផ្នែកមួយនៃកិច្ចព្រមព្រៀងឈប់បាញ់ ប្រសិនបើទីក្រុងតេអេរ៉ង់បើកច្រកសមុទ្រហ័រមូសឡើងវិញទាំងស្រុង។ ច្រកសមុទ្រនេះ ដែលជាផ្លូវដឹកជញ្ជូនប្រេង និងឧស្ម័នដ៏សំខាន់បំផុតមួយរបស់ពិភពលោក ត្រូវបានបិទចាប់តាំងពីសង្គ្រាមបានចាប់ផ្តើមនៅថ្ងៃទី២៨ ខែកុម្ភៈ។

ការប្រកាសនេះបានកើតឡើងបន្ទាប់ពីប្រទេសប៉ាគីស្ថានបានធ្វើសំណើនាទីចុងក្រោយដើម្បីជៀសវាងការវាយប្រហារ ដ៏ធំរបស់សហរដ្ឋអាមេរិកលើប្រទេសអ៊ីរ៉ង់ ដោយលោក Trump បានព្រមានថា “ប្រទេសអ៊ីរ៉ង់ទាំងមូលនឹងស្លាប់នៅយប់នេះ” លុះត្រាតែកិច្ចព្រមព្រៀងមួយត្រូវបានព្រមព្រៀងគ្នាត្រឹមថ្ងៃផុតកំណត់ថ្ងៃអង្គារ។

នៅក្នុងសារលើបណ្ដាញសង្គមរបស់លោក លោក Trump បាននិយាយថា លោកបានសម្រេចចិត្តពន្យារពេលការពង្រីក ការវាយប្រហាររបស់អាមេរិក «ដោយផ្អែកលើការសន្ទនា» ជាមួយនាយករដ្ឋមន្ត្រីប៉ាគីស្ថាន Shehbaz Sharif និងឧត្តមសេនីយ៍ Asim Munir ប្រមុខកងទ័ពដ៏មានឥទ្ធិពលរបស់ប៉ាគីស្ថាន។

ក្រុមប្រឹក្សាសន្តិសុខកំពូលអ៊ីរ៉ង់ បាននិយាយថា ព័ត៌មានលម្អិតនៃសំណើចរចាជាមួយសហរដ្ឋអាមេរិកដើម្បីបញ្ចប់សង្គ្រាម នឹងចាប់ផ្តើមនៅថ្ងៃសុក្រនៅទីក្រុងអ៊ីស្លាម៉ាបាដ ប្រទេសប៉ាគីស្ថាន។

ប្រភព: CNA news