ឡានក្រុងធ្លាក់ចូលទន្លេនៅនេប៉ាល់ បណ្តាលឲ្យមនុស្ស ១៩ នាក់ស្លាប់ 

កាត់ម៉ាន់ឌូ៖ ប៉ូលីសបាននិយាយកាលពីថ្ងៃចន្ទ ទី២៣ ខែកុម្ភៈថា ឡានក្រុងមួយគ្រឿងនៅប្រទេសនេប៉ាល់បានរអិលធ្លាក់ចេញពីផ្លូវភ្នំមួយ ហើយធ្លាក់ចូលទៅក្នុងទន្លេទឹកកកមួយ ដោយបានសម្លាប់មនុស្សយ៉ាងហោចណាស់ ១៩នាក់ រួមទាំងអ្នកទេសចរអង់គ្លេសម្នាក់ផងដែរ។

ឡានក្រុងដែលធ្វើដំណើរពីទីក្រុងទេសចរណ៍ Pokhara ទៅកាន់រដ្ឋធានី Kathmandu បានធ្លាក់ពីលើភ្នំកម្ពស់ជាង ២០០ ម៉ែត្រចូលទៅក្នុងទន្លេ Trishuli ក្នុងស្រុក Dhading នៅព្រឹកព្រលឹមថ្ងៃចន្ទ។

មន្ត្រីប៉ូលីសជាន់ខ្ពស់ក្នុងតំបន់ លោក Prakash Dahal បានប្រាប់ AFP ថា “ក្នុងចំណោមមនុស្ស ៤៤ នាក់ សរុបមនុស្ស ១៩ នាក់បានស្លាប់ និង ២៥ នាក់កំពុងទទួលការព្យាបាល” ដោយបញ្ជាក់ថាពលរដ្ឋអង់គ្លេសម្នាក់ស្ថិតក្នុងចំណោមអ្នកស្លាប់។

លោកបាននិយាយថា ជនជាតិចិនម្នាក់ និងជនជាតិនូវែលសេឡង់ម្នាក់បានរងរបួស ដោយមិនបានផ្តល់ព័ត៌មានលម្អិតបន្ថែមទេ។

គ្រោះថ្នាក់ចរាចរណ៍ដ៏សាហាវគឺជាករណីដែលតែងកើតមានជារឿយៗ នៅក្នុងសាធារណរដ្ឋហិម៉ាឡៃយ៉ាដោយសារតែផ្លូវមិនល្អ យានយន្តដែលមិនបានថែទាំ និងបណ្តាលមកពីការបើកបរដោយមិនប្រុងប្រយ័ត្ន។

ប្រភព: CNA news